Layang Kabar

Suwek 'Bunga Bangkai' Rasane Gurih

2008-11-12T07:20:00.000-08:00

Suwuk salah sawijining pala pendhem. Thukule yen wayah rendeng. Uwite nglencir ijo belang-belang putih, kaya ana panunen. Mangsa ketiga uwite mati uatawa garing. Iku pertandhane wis tuwa lan uwohe (umbine) siap diunduh.

Kanggo sedulur ing padesan, biasane suwek sing wis dionceki (kulite isa ditandur) banjur didhang utawa dikukus lan diuyahi. Yen ora entek, isa digoreng. Rasane gurih. Luwih-luwih suwek sing warnane rada kuning. Oh .. iya, suwek kuwi ana rong jenis, saliyane kuning uga ana sing putih.

Nanging suwek sing sugih karbohidrat iki pancen umure rada dawa. Ora iso tiap taun panen. Biasane thukulan pertama nganti mati gedene ora ana sakepel. Banjur musim udan thukul maneh, uwohe mundhak gedhe. Ning ya tergantung lemahe uga.

Kira-kira telung taun, uwohe suwek gedhene lagi isa sak endas. Yen ora diundhuh, suwek bakal metu kembange. Jenenge jeboh. Ambune ora nguwati. Badeg banget, kaya bathang (bangkai).

Kembange suwek iki cukup unik. Rupane abang tuwa, tur gedhe, dhuwure isa nganti 30 sentimeter. Sing ora ngerti, kembang iki diarani bunga bangkai. Malah akeh sing nggathuke muncule kembang iki karo bab gaib kaya sing asring muncul ing koran.

Padhahal iki ngana kembang suwek, sing sejatine umbine rasane lezat. Lan wis makaping-kaping diteliti yen suwek ngono kandungan gizine ora kalah karo pala pendhem liyane utawa beras. Dadi iso kanggo bahan panganan alternatif. Nuwun

Royokan Balung

2008-11-10T23:49:00.000-08:00

Persis 11 November 2008, ing salah sijine hotel sing dumunung ana Jl Raya Darmo lagi ana etung-etungan suara Pilgub Jatim. Atusan wong saka kubune KaJi lan KarSa tumplek blek ing ngarepe hotel, padha aweh dukhungan marang jagone dewe-dewe. Polisi dibantu tentara ora ketinggalan. Melu sibuk ngamanake supaya ora dredah lan padudon. Wong ya padha rakyat Jawa Etane, getihe lan atine padha, semangat mbangun pranatan sing resik, jujur, ora korupsi lan ngutamakake kepetingan rakyat.
Nanging emane, apa sing ditindakake pendukunge para calon malah sak walike. Gawe ontran-ontran rebutan balung, golek menang. Kamangka apa sing wis ditindakake ngganggu kepentingane liyan. Malah kabare ana bakul ideran sing dijotosi amarga dituduh provokator dening salah siji kubu pendukung cagub. Duh Gusti nyuwun ngapunten...!
Banjur piye critane yen wis dadi gubernur ? Mesthi malah ruwet. Durung dadi wae wis adigang, adigung, adiguna. Apa maneh yen wis duwe kedudukan. Mripat dadi wuto, ati peteng, kuping budeg, tangan ciker, sikil mlungker, irung buntet. Sing obah mung lambene, adol jamu. Kandhane cah enom; isane mung ngecak ngalor ngidul ning ora ana wujude.
Lha koyok entut ya ! Ya mesthine ngono. Ora ana wujude, ning ambune gawe wong kiwa tengene semaput. Iku dudu sing dikarepke sedulurku ing padesan, ing pinggir laut, ing pucuk gunung lan ing tengah alas. Sapa wae wonge ora masalah. Ning ya kuwi, priyayine aja mung isa ngentut. Nanging tangane bisa cekatan, lakune trengginas, pengrungone tajem, mripate awas, lan atine padhang. Dadine kamulyan. Ora mung rebutan balung, golek balene nalikane adol umuk ing kampanye. Nuwun

Pahlawane Surabaya ?

2008-11-09T18:34:00.000-08:00

Petugas kebersihan siji iki perlu ditiru. Dewekne bener-bener njaga kelestarian lingkungan. Saliyane ngawasi kebersihan lan jupuki sampah sing kleleran ing pinggir dalam, uga kampanye hemat energi lan ramah lingkungan.

Sanadyan sing asring gawe regete dalan sing gawene numpak kendaraan, deweke tetep iklas ngontel sakdawane dalan Kutho Pahlawan. saka Balai Kota, Jl Pemuda, Gubernur Suryo, terus nganti Jl Pahlwan, ora ana sing kliwatan. Kabeh diawasi, aja nganti sampah numpuk lan ngganggu kenyamanane masyarakat. Selamat berjuang ngih pak ! Nuwun

Sapi Kereman Nguntungake

2008-11-05T19:42:00.000-08:00

Kanggone petani, rasane ora pas yan mulih saka sawah ora nyangking suket utawa damen kanggo pakan raja kaya. Upamane sapi, wedus, kebo lan sapanunggalane. Mulane rata-rata petani mesti duwe ingon-ingon.

Liyane kuwi, yen duwe ingon-ingon, limbahe tetanen ora perlu dibuang. Damene pari, lunge tela, glagahe tebu, isa dimanfaatake kanggo pakan kewan. Malah isa kanggo cadangan pakan nganti pirang-pirang ulan, ora perlu ngarit.

Kaya petani ing Plaosan, Magetan, Jawa Etan. Ing daerah erenge Gunung Lawu iki, wargane akeh sing petani. Meh saben omah duwe ingon-ingon sapi. Ora mung sapi putih (lokal) nanging sing akeh malah sapi turunan, Brahman utawa jenis Limosin.

Sapi tumrape para petani ing Plaosan, ora mung klangenan. Nanging uga dadi celengan. Saben panenan yen bathine rada akeh mesthi ditukokake sapi bakalan. Yaiku sapi sing isih enom utawa durung ndaging. Saiki regane sapi bakalan kira-kira Rp 6 yuta nganti Rp 7 yuta.

Terus, sapi iki dikerem ing kandhang nganti gedhe. Mulane akeh sing nyebut sapi kereman. Biasane sapi iki lagi ditawake marang blantik yen wis powel (untune pupak), utawa umur setahun kawit ngingu. Kira-kira regane isa nganti Rp 15 yuta. Utawa maneh yen wayahe tahun sekolah anyar, wis mesti akeh sing dodolan sapi. Merga kanggo bayar sekolahe anake.

Unike maneh, ing desa, sapi-sapi iku biasane kandhange campur karo pawon (dapur). Mulane yen sapa wae tindak neng sedulure ana ndesa sing duwe sapi, aja gumun yen saka kadohan wis mambu kletong. Apa maneh, kletonge kewan siji iki pancen dieman-eman. Disimpen lan ora oleh kena udan, supaya isa dadi rabuk. Sak karung kletong sing wis dadi rabuk biasane ditawakake Rp 5000. Lumayan isa kanggo tuku katul, comborane sapi. Nuwun